Tá an Coimisiún ag iarraidh ar Temu agus ar Shein tuilleadh faisnéise a chur ar fáil maidir leis na bearta atá déanta acu chun oibleagáidí DSA a chomhlíonadh a bhaineann leis an sásra ar a dtugtar ‘Fógra agus Gníomhaíocht’ (lena gceadaítear d’úsáideoirí fógra a thabhairt faoi tháirgí neamhdhleathacha), na comhéadain ar líne (ar cheart iad a dhearadh ar bhealach nach ndéanann úsáideoirí a mheabhlú ná a ionramháil trí ‘phatrúin dhorcha’), mionaoisigh a chosaint, trédhearcacht córas moltóra, inrianaitheacht trádálaithe agus comhlíonadh trí dhearadh.
Tá an ghníomhaíocht forfheidhmithe seo bunaithe freisin ar ghearán a chuir eagraíochtaí tomhaltóirí faoi bhráid an Choimisiúin.
Ní mór do Temu agus Shein araon an fhaisnéis a iarradh a chur ar fáil faoin 12 Iúil 2024. Bunaithe ar an measúnú ar na freagraí, déanfaidh an Coimisiún measúnú ar na chéad chéimeanna eile. D’fhéadfadh tionscnamh foirmiúil imeachtaí de bhun Airteagal 66 den Ionstraim um Sheirbhísí Digiteacha a bheith i gceist leis sin.
De bhun Airteagal 74 (2) den Ionstraim um Sheirbhísí Digiteacha, is féidir leis an gCoimisiún fíneálacha a ghearradh as faisnéis mhícheart, neamhiomlán nó mhíthreorach mar fhreagairt ar iarraidh ar fhaisnéis. I gcás nach dtugtar freagra, féadfaidh an Coimisiún a chinneadh an fhaisnéis a iarraidh trí chinneadh. Sa chás sin, mura dtabharfaí freagra faoin spriocdháta, d’fhéadfadh sé go bhforchuirfí íocaíochtaí pionósacha tréimhsiúla.
Tar éis a n -ainmnithe mar Ardáin An-Mhór ar Líne, tá Temu agus Shein faoi réir mhaoirseacht an Choimisiúin, lena n-áirítear maidir le hoibleagáidí ginearálta DSA, a tháinig i bhfeidhm an 17 Feabhra 2024 agus atá faoi réir na hiarrata ar fhaisnéis a seoladh an 28 Meitheamh. Leanann Coimsiún na Meán agus an Coimisiún um Iomaíocht agus Cosaint Tomhaltóirí ag maoirsiú Temu agus Shein i leith a gcuid dualgas ginearálta faoin DSA mar údaráis inniúla na hÉireann. Tá ceithre mhí ag temu agus Shein ón ainmniú chun na rialacha níos déine faoi DSA a chomhlíonadh, go háirithe an oibleagáid measúnú cuí a dhéanamh ar aon rioscaí sistéamacha a eascraíonn as a gcuid seirbhísí agus iad a mhaolú, amhail scaipeadh táirgí neamhshábháilte agus góchumtha.