WiFi4EU: Kumpaniji

X’inhu WiFi4EU, u kif jaħdem?

WiFi4EU hija inizjattiva tal-UE li tipprovdi vawċers għall-valur ta’ EUR 15,000 biex ikopru l-ispejjeż tat-tagħmir u l-installazzjoni tal-punti ta’ aċċess tal-Wi-Fi lil eluf ta’ muniċipalitajiet madwar l-Ewropa. Il-benefiċjarji jagħżlu ċ-“ċentri tal-ħajja komunitarja” fejn jiġu installati l-hotspots tal-WiFi4EU. Il-hotspots tal-Wi-Fi normalment jiġu installati fi spazji pubbliċi fuq ġewwa jew fuq barra, fejn diġà ma jeżistu l-ebda offerti simili ta’ konnettività tal-Wi-Fi mingħajr ħlas. Dawn jistgħu jinkludu l-muniċipji, iċ-ċentri tas-saħħa, il-pjazez pubbliċi, it-toroq pedonali, u aktar. 

Hija skema ta’ finanzjament issimplifikata li għall-ewwel darba tipprovdi vawċers trasferiti mill-muniċipalitajiet lill-kumpaniji tal-installazzjoni tal-Wi-Fi li waqqfu l-hotspots.

Il-muniċipalitajiet li jirċievu vawċer huma liberi li jiddefinixxu u jakkwistaw il-proġetti ta’ installazzjoni tal-Wi-Fi lokali tagħhom skont ir-regoli tal-akkwist applikabbli. Huma jistgħu jikkonsultaw il-lista ta’ kumpaniji tal-installazzjoni tal-Wi-Fi rreġistrati li joperaw fiż-żona ġeografika tagħhom.

Reġistrazzjoni fuq il-portal

Ladarba muniċipalità tkun applikat b’suċċess għal vawċer, dawn ikollhom perjodu ta’ 18-il xahar biex jiżguraw l-installazzjoni tal-hotspot tal-WiFi4EU. Huma jniedu proċess ta’ akkwist għall-għażla ta’ kumpanija tal-installazzjoni tal-Wi-Fi. Bħala kumpanija tal-installazzjoni tal-Wi-Fi, trid tirreġistra fuq il-portal online sabiex tirċievi remunerazzjoni għall-valur tal-vawċer mill-Kummissjoni Ewropea.

Kif tirreġistra bħala kumpanija tal-installazzjoni tal-Wi-Fi

Il-kumpaniji tal-installazzjoni tal-Wi-Fi jistgħu jirreġistraw fuq il-portal tal-WiFi4EU permezz ta’ taqsima ddedikata, fejn tintalab tipprovdi d-dettalji li ġejjin:

• informazzjoni dwar il-kumpanija
• informazzjoni dwar iż-żona ġeografika (pajjiżi jew żoni f’pajjiżek) fejn topera l-kumpanija tiegħek
• informazzjoni dwar persuna ta’ kuntatt

Ir-reġistrazzjoni fuq il-portal WiFi4EU mill-kumpaniji tal-installazzjoni tal-Wi-Fi hija essenzjali għat-tisrif tal-vawċers.

Speċifikazzjonijiet tekniċi

Ir-rekwiżiti tekniċi għan-netwerks tal-WiFi4EU huma stabbiliti fil- Mistoqsija Frekwenti 27 u speċifikati aktar fil- kundizzjonijiet tas-sejħa u fil-mudell tal-ftehim ta’ għotja. Dawn ir-rekwiżiti jagħtu dettalji dwar l-għadd minimu ta’ punti ta’ aċċess fuq ġewwa u fuq barra, kif ukoll il-kapaċitajiet tekniċi ta’ kull wieħed minn dawn il-punti ta’ aċċess. Jekk jogħġbok irreferi għall-punt 6.2.2 tal-kundizzjonijiet tas-sejħa għall-ispeċifikazzjoni teknika sħiħa

Proċedura ta’ ħlas

Il-valur tal-vawċer ta’ EUR 15 000 jitħallas direttament lill-kumpaniji tal-installazzjoni mill-Kummissjoni Ewropea fi żmien massimu ta’ 60 jum. Dan il-pagament isir permezz ta’ trasferiment bankarju, wara konferma mill-Kummissjoni Ewropea li l-hotspots tal-WiFi4EU huma operazzjonali. Huwa esklussivament permezz tal-portal li l-kumpanija tal-installazzjoni u l-muniċipalità kkonċernata jinnotifikaw li n-netwerk tal-Wi-Fi huwa installat u operattiv. Ladarba l-Kummissjoni tivverifika din l-informazzjoni, is-somma tal-vawċer titħallas direttament lill-kumpanija tal-installazzjoni. Il-muniċipalità tħallas kwalunkwe bilanċ ogħla mill-valur tal-vawċer dovut lill-kumpanija tal-installazzjoni tal-Wi-Fi.

Ikkuntatjana