Settur diġitali ekoloġiku

Matul id-Deċennju Diġitali, l-Ewropa qed tiffaċċja żewġ sfidi importanti: it-tranżizzjoni ekoloġika u t-tranżizzjoni diġitali. 

Dawn jistgħu jidhru bħala żewġ kwistjonijiet distinti, iżda huma verament sfidi doppji - u lanqas ma jistgħu jirnexxu mingħajr l-oħra - u, it-tnejn huma ugwalment importanti għall-futur tal-Ewropa. 

L-introduzzjoni tad-diġitali f’ħajjitna qed tgħinna nnaqqsu l-impronta tal-karbonju tagħna. Nistgħu ningħaqdu mal-vidjokonferenzi aktar milli nivvjaġġaw għal-laqgħat, nimmonitorjaw kemm qed jikkunsmaw enerġija djarna, u saħansitra nagħtu spinta lis-sostenibbiltà fil-biedja.  

Madankollu, jeħtieġ li niżguraw li t-teknoloġiji diġitali ma jikkunsmawx aktar enerġija milli jiffrankaw. Bħalissa, it-teknoloġiji diġitali jammontaw għal bejn 8-10 % tal-konsum tal-enerġija tagħna, u 2-4 % tal-emissjonijiet tal-gassijiet serra tagħna – perċentwali żgħar iżda numri kbar. 

Nistgħu nagħmlu għadd ta’ bidliet fil-ħajja diġitali tagħna biex innaqqsu l-impatt ambjentali tagħna f’dan il-qasam. Pereżempju, l-estensjoni tal-ħajja tal-ismartphones kollha b’sena biss tiffranka 2.1 Mt CO2 fis-sena sal-2030, ekwivalenti għat-tneħħija ta’ miljun karozza mit-toroq tagħna. Il-bidla minn networks 4G għal networks 5G tista’ tnaqqas il-konsum tal-enerġija b’sa 90 %.

L-UE qed tirriċerka dawn l-opportunitajiet u aktar. Se naġġornaw il-liġijiet eżistenti u nintroduċu miżuri ġodda biex nilħqu l-għanijiet ekoloġiċi u diġitali tagħna għall-għaxar snin li ġejjin. Waħda minn dawn il-miżuri hija li jiġi żgurat li ċ-ċentri tad-data jkunu newtrali għall-klima, effiċjenti fl-użu tal-enerġija u sostenibbli sa mhux aktar tard mill-2030.  

L-UE qed tesplora wkoll miżuri volontarji u vinkolanti biex tgħin lis-settur privat isir newtrali għall-klima u juża aktar riżorsi rinnovabbli. Xi eżempji ta’ dan huma l-Koalizzjoni Diġitali Ekoloġika Ewropea, u l-inizjattivi differenti għall-Ekoloġizzazzjoni tas-settur Awdjoviżiv.

Il-Pjan Industrijali tal-Patt Ekoloġiku

Il-Kummissjoni Ewropea pproponietPjan Industrijali tal-Patt Ekoloġiku biex tappoġġa l-għan tagħha li tikseb in-newtralità klimatika sal-2050 filwaqt li ssaħħaħ il-kompetittività tal-industrija b’emissjonijiet żero netti tal-Ewropa.

Pilastru ewlieni tal-pjan huwa li jiġi żgurat li l-UE jkollha aċċess għal teknoloġija, prodotti u soluzzjonijiet li huma kruċjali għat-tranżizzjoni lejn emissjonijiet żero netti. Dawn jinkludu ċ-ċelloli fotovoltajċi, it-turbini eoliċi, il-batteriji, l-elettrolizzaturi tal-idroġenu, il-qbid tal-karbonju, it-tagħmir tal-ħżin u aktar. Prodotti u soluzzjonijiet bħal dawn jirrappreżentaw ukoll sors ewlieni ta' tkabbir ekonomiku u impjiegi ta' kwalità fl-Ewropa.

Biex jinkiseb dan, huwa jiddeskrivi proċess biex jitħaffef l-investiment u l-finanzjament għall-produzzjoni tat-teknoloġija nadifa fl-Ewropa, li jpoġġi lill-UE fuq quddiem nett tar-rivoluzzjoni tat-teknoloġija nadifa. Minbarra li jħares lejn ideat ġodda bħall-flessibbiltà temporanja fir-regoli dwar l-għajnuna mill-Istat, il-pjan jipproponi li jiġi eżaminat kif il-fondi eżistenti u l-finanzjament komuni fil-livell tal-UE jistgħu jintużaw biex jiffinanzjaw l-innovazzjoni, il-manifattura u l-użu tat-teknoloġija nadifa.