Ħiliet diġitali

It-tixrid tat-teknoloġiji diġitali qed ikollu impatt enormi fuq l-ekonomija u s-soċjetà. Il-ħiliet diġitali bażiċi huma prekundizzjoni għall-inklużjoni u l-parteċipazzjoni fis-suq tax-xogħol u fis-soċjetà. L-innovazzjonijiet u l-iskoperti rivoluzzjonarji f’oqsma differenti bħall-intelliġenza artifiċjali, id-dinjiet virtwali, ir-robotika, it-teknoloġija kwantistika u s-6G qed jiskattaw mewġa ta’ domanda għal ġenerazzjoni ġdida ta’ ħiliet diġitali avvanzati.

Il-Programm ta’ Politika Perkors għad-Deċennju Diġitali jistabbilixxi l-objettiv tal-UE li tiżviluppa ħiliet u kompetenzi diġitali bażiċi u avvanzati biex jiggwidaw it-trasformazzjoni diġitali. Dan jiddeskrivi l-miri ambizzjużi tal-UE li tiżgura li 80 % tal-adulti jkollhom mill-inqas ħiliet diġitali bażiċi u li jilħqu 20 miljun speċjalista tal-ICT impjegati. Tippromwovi wkoll l-aċċess tan-nisa għal dan il-qasam u żżid l-għadd ta’ gradwati fl-ICT, sal-2030.

Inizjattivi Ewlenin biex jiġu appoġġati l-ħiliet diġitali

F’konformità mal-linji gwida politiċi tal-President tal-Kummissjoni dwar Unjoni ta’ Ħiliet, l-approċċ Ewropew għall-ħiliet diġitali jinkludi l-esplorazzjoni u l-pilotaġġ ta’ mekkaniżmi ta’ portabbiltà tal-ħiliet bħall-mikrokredenzjali, iżda wkoll l-appoġġ għall-ħidma fuq kurrikuli konġunti.

Il-Programm Ewropa Diġitali (DEP) investa aktar minn EUR 294 miljun biex jappoġġa inizjattivi ta’ taħriġ f’ħiliet, titjib tal-ħiliet u taħriġ mill-ġdid bil-għan li jittejbu l-ħiliet diġitali tal-forza tax-xogħol tal-UE. Dawn l-inizjattivi ta’ taħriġ ikopru oqsma bħall-intelliġenza artifiċjali, ix-xjenza tad-data, il-cloud computing u ċ-ċibersigurtà. Id-DEP jiffinanzja wkoll inizjattivi biex jattira talent żagħżugħ lejn il-qasam tal-ICT, jibni ekosistema b’saħħitha tal-EdTech, u jiffaċilita l-kondiviżjoni sigura tad-data permezz tal-Ispazju Komuni Ewropew tad-Data għall-Ħiliet. Tista' ssib aktar informazzjoni fil-fuljett dwar il-proġetti attwali tagħna [pdf].

Pass importanti lejn l-ilħuq tal-miri huwa li l-informazzjoni u r-riżorsi ta’ kwalità għolja jsiru disponibbli għaċ-ċittadini u n-negozji kollha tal-UE. Il-Pjattaforma għall-Ħiliet u l-Impjiegi Diġitali toffri aċċess miftuħ għal repożitorju ta’ opportunitajiet ta’ apprendiment, perkorsi ta’ apprendiment, gwida għall-karriera, immappjar tal-ħiliet u xejriet tal-impjiegi, kif ukoll opportunitajiet ta’ finanzjament u l-aħjar prattiki. Tappoġġa wkoll il-Koalizzjonijiet Nazzjonali għall-Ħiliet u l-Impjiegi Diġitali, li jlaqqgħu flimkien firxa ta’ sħab bil-għan li jiżviluppaw miżuri konkreti biex iwasslu l-ħiliet diġitali f’kull livell tas-soċjetà f’pajjiżhom.

Oqsma oħra ta’ politika li jikkontribwixxu wkoll għall-ħidma tal-Kummissjoni dwar il-ħiliet diġitali jinkludu:

• Il-Pjan ta’ Azzjoni għall-Edukazzjoni Diġitali
• L-Aġenda għall-Ħiliet għall-Ewropa
• Il-Pjan ta’ Azzjoni tal-Pilastru Ewropew tad-Drittijiet Soċjali
• Ħidma biex jittejjeb il-litteriżmu medjatiku
• L-istrateġija Ewropea għad-data
• L-istrateġija industrijali Ewropea
• L-istrateġija Ewropea għall-intrapriżi żgħar u ta' daqs medju
• Hubs ta’ Innovazzjoni Diġitali Ewropej (EDIHs)
• Il-pjan ikkoordinat dwar l-intelliġenza artifiċjali

Il-kuntest

Għad fadal xogħol sinifikanti xi jsir biex jintlaħqu l-miri tal-2030 dwar il-ħiliet diġitali: 55,6 % biss tal-popolazzjoni tal-UE għandha mill-inqas ħiliet diġitali bażiċi u, bil-pass attwali, l-għadd ta’ speċjalisti tal-ICT se jilħaq biss 12-il miljun sal-2030. Aktar informazzjoni u data reċenti jistgħu jinstabu fuq id-dashboard tad-DESI għad-Deċennju Diġitali, ir-Rapport dwar l-istat tad-Deċennju Diġitali 2024 u d-Dokument ta’ Ħidma tal-Persunal tal-Kummissjoni li jakkumpanjah, id-Deċennju Diġitali fl-2024: Implimentazzjoni u perspettiva.