Korpi għas-soluzzjoni tat-tilwim barra mill-qorti skont l-Att dwar is-Servizzi Diġitali (DSA)

L-utenti jistgħu jikkontestaw deċiżjonijiet ta' moderazzjoni tal-kontenut li jirrestrinġu l-kontijiet tagħhom jew jissanzjonaw il-kontenut tagħhom b'diversi modi. Dan id-dritt japplika wkoll għal rapporti ta' kontenut illegali li ġew irrifjutati mill-pjattaforma. Skont id-DSA, l-utenti jistgħu jappellaw għas-sistema interna tat-trattament tal-ilmenti tal-pjattaformi, li tirrikjedi li l-pjattaformi jirrieżaminaw id-deċiżjonijiet tagħhom. 

Id-DSA jippermetti wkoll lill-utenti jirreferu għal korpi għas-soluzzjoni tat-tilwim barra mill-qorti. Dawn il-korpi huma alternattiva għall-proċedimenti ġudizzjarji u joffru mod aktar rapidu u kosteffettiv biex jissolva t-tilwim. L-utenti jistgħu jagħżlu kwalunkwe korp għas-soluzzjoni tat-tilwim barra mill-qorti - li jkun ġie ċċertifikat mill-UE għat-tip ta' tilwima tagħhom - u jitolbu rieżami tad-deċiżjoni ta' moderazzjoni tal-kontenut ta' pjattaforma. Il-pjattaformi online huma obbligati jinvolvu ruħhom ma’ dan il-korp. Fl-aħħar nett, l-utenti dejjem jistgħu jressqu l-kwistjoni quddiem il-qrati nazzjonali tagħhom.

Kemm l-utenti kif ukoll il-pjattaformi online jridu jimpenjaw ruħhom in bona fede mal-korp magħżul għas-soluzzjoni tat-tilwim barra mill-qorti bil-ħsieb li jsolvu t-tilwima. L-allokazzjoni tat-tariffi tiddependi fuq l-eżitu tal-proċedura. Fi kwalunkwe każ, għar-riċevituri tas-servizz, is-soluzzjoni tat-tilwim normalment tkun disponibbli mingħajr ħlas jew bi ħlas nominali. Il-korpi għas-soluzzjoni tat-tilwim barra mill-qorti ma għandhomx is-setgħa li jimponu soluzzjoni vinkolanti tat-tilwima fuq il-partijiet, iżda joffru rieżami ġust u rapidu.

L-organizzazzjonijiet li jixtiequ jsiru korp għas-soluzzjoni tat-tilwim barra mill-qorti jeħtieġ li jissottomettu applikazzjoni mal-Koordinatur tas-Servizzi Diġitali (DSC) tal-pajjiż tal-istabbiliment tagħhom.

Id-DSCs huma responsabbli għas-sorveljanza tal-implimentazzjoni tad-DSA fil-pajjiż rispettiv tagħhom, inklużi korpi għas-soluzzjoni tat-tilwim barra mill-qorti. Iċ-ċertifikazzjoni hija valida għal massimu ta’ ħames snin u tista’ tiġġedded. Il-korpi ċċertifikati għandhom jirrispettaw ċerti kundizzjonijiet:

• Imparzjalità u indipendenza: Il-korp irid ikun imparzjali u indipendenti (inkluż finanzjarjament) mill-fornituri tal-pjattaformi online u mir-riċevituri tas-servizzi, inklużi individwi li jkunu ressqu lment.
• Għarfien espert: Il-korp jeħtieġ li jkollu għarfien espert f'qasam partikolari wieħed jew aktar ta' kontenut illegali jew fl-applikazzjoni u l-infurzar tat-termini u l-kundizzjonijiet ta' tip wieħed jew aktar ta' pjattaforma online.
• Remunerazzjoni: Il-membri tal-korp jitħallsu b’mod li jkun indipendenti mill-eżitu tal-proċedura.
• Aċċessibbiltà: Is-soluzzjoni tat-tilwim barra mill-qorti trid tkun faċilment aċċessibbli, li tippermetti s-sottomissjoni ta’ lment u dokumenti ta’ sostenn online.
• Effiċjenza: Il-korp għandu jkun kapaċi jsolvi t-tilwim b'mod rapidu, effiċjenti u kosteffettiv u b'mill-inqas waħda mil-lingwi uffiċjali tal-UE.
• Regoli ta' proċedura: Il-korp irid jopera f’konformità ma’ regoli ta’ proċedura ċari u ġusti li jkunu faċilment u pubblikament disponibbli u li jikkonformaw mal-liġi applikabbli.

Korpi bbażati fl-UE biss jistgħu jiġu ċċertifikati bħala korpi għas-soluzzjoni tat-tilwim barra mill-qorti. Dan jiżgura li l-korpi għas-soluzzjoni tat-tilwim barra mill-qorti joperaw fi ħdan il-qafas regolatorju tal-UE, u jikkontribwixxu għal approċċ armonizzat fis-soluzzjoni tat-tilwim dwar il-moderazzjoni tal-kontenut. Iċ-ċertifikazzjoni hija valida fl-Istati Membri kollha. Madankollu, ċertifikazzjoni tista’ tkun limitata għal ċerti oqsma ta’ għarfien espert (tipi partikolari ta’ kontenut illegali jew tipi partikolari ta’ pjattaformi online) jew ċerti lingwi li bihom il-korp ikun kapaċi jsolvi t-tilwim.

Il-korpi għas-soluzzjoni tat-tilwim barra mill-qorti jipprovdu rapporti annwali lid-DSCs nazzjonali tagħhom dwar il-ħidma tagħhom. Min-naħa tiegħu, kull DSC jirrapporta darba kull sentejn dwar il-funzjonament tal-korpi kollha għas-soluzzjoni tat-tilwim barra mill-qorti li jkun iċċertifika. Dawn ir-rapporti fihom informazzjoni dwar l-għadd ta’ tilwim, l-eżiti tagħhom, iż-żmien meħud biex jiġi solvut it-tilwim, id-diffikultajiet iffaċċjati, l-aħjar prattiki u r-rakkomandazzjonijiet biex jittejjeb il-funzjonament.

Il-Kummissjoni tippubblika u taġġorna – wara notifika mid-DSCs – lista ta’ korpi għas-soluzzjoni tat-tilwim barra mill-qorti ċċertifikati. Ara l-lista ta’ korpi approvati għas-soluzzjoni tat-tilwim barra mill-qorti hawn taħt.