Foghlaim dhigiteach agus TFC san oideachas

An plean gníomhaíochta maidir leis an bhfoghlaim dhigiteach

Is tionscnamh beartais de chuid an Aontais Eorpaigh (AE) é an Plean Gníomhaíochta don Oideachas Digiteach (2021-2027) chun tacú le hoiriúnú inbhuanaithe agus éifeachtach chórais oideachais agus oiliúna Bhallstáit an Aontais don ré dhigiteach.  

Chun a chuspóirí a bhaint amach, leagtar amach sa Phlean Gníomhaíochta 13 ghníomhaíocht in dhá réimse tosaíochta: 

1. Forbairt éiceachórais oideachais dhigitigh ardfheidhmíochta a chothú;
2. Scileanna agus inniúlachtaí digiteacha a fheabhsú le haghaidh an chlaochlaithe dhigitigh.

Faoi thosaíocht 1, gníomhaíocht 6, cuireadh de chúram ar ghrúpa saineolaithe treoirlínte eiticiúla a fhorbairt maidir leis an intleacht shaorga agus úsáid sonraí san oideachas agus san oiliúint bunaithe ar na Treoirlínte Eitice maidir leis an Intleacht Shaorga Iontaofa, a chuir an Grúpa Ardleibhéil Saineolaithe um an Intleacht Shaorga i láthair in 2019.

Faoi thosaíocht 2, gníomhaíocht 7, cuireadh de chúram ar ghrúpa saineolaithe treoirlínte comhchoiteanna a fhorbairt do mhúinteoirí agus d’oideoirí chun litearthacht dhigiteach a chothú agus chun dul i ngleic leis an mbréagaisnéis tríd an oideachas agus an oiliúint.

Táthar ag súil go mbeidh na treoirlínte réidh i mí Mheán Fómhair 2022.

Ghlac an Coimisiún Eorpach Teachtaireacht in 2017 freisin maidir leis an bhféiniúlacht Eorpach a neartú tríd an oideachas agus tríd an gcultúr. Ba í an Teachtaireacht sin ionchur an Choimisiúin i gcruinniú na gceannairí maidir le hoideachas agus cultúr ag cruinniú mullaigh Göteborg. Ní mór roinnt gníomhaíochtaí a ghlacadh faoi 2025.

Taighde agus Nuálaíocht don Fhoghlaim Dhigiteach a Mhaoiniú

Maoiníonn an Coimisiún Eorpach go leor gníomhaíochtaí maidir le taighde agus nuálaíocht don fhoghlaim dhigiteach faoi roinnt clár, lena n-áirítear Fís Eorpach agus an Clár don Eoraip Dhigiteach, mar aon leis na cláir fasach Fís 2020, an seachtú Clár Réime (FP7) agus an Creatchlár um Iomaíochas agus Nuálaíocht (CIP).

Faoin gclár Fís Eorpach agus faoin gClár don Eoraip Dhigiteach, tá na glaonna seo a leanas beartaithe:

• eXtended Reality Learning — Engage and Interact (TOPIC ID: HORIZON-CL4-2022-HUMAN-01-19), dáta oscailte: 21 Nollaig 2021;
• Áirítear i nglaonna faoi chlár oibre an Chláir don Eoraip Dhigiteach le haghaidh 2021-22 gníomhaíochtaí ullmhúcháin don spás sonraí le haghaidh scileanna a bheidh ar oscailt idir 17/11/2021-22/02/2022.

Cumhdaíodh na réimsí seo a leanas faoi Fhís 2020:

• Scéim meantóireachta do scoileanna: an nuálaíocht a phríomhshruthú trí na hardchleachtais teagaisc atá bunaithe ar TFC a scaipeadh ar chiorcal leathan scoileanna (DT-TRANSFORMATIONS-21-2020); Idirlíon cumhachtaithe cuimsitheach don chéad ghlúin eile (ICT-2019-30);
• Forbairt comhpháirtíochta idirnáisiúnta i dtíortha ísealioncaim agus meánioncaim (ICT-39-2016-2017);
• teicneolaíochtaí don fhoghlaim agus do scileanna (TFC-22-2016);
• teicneolaíochtaí le haghaidh foghlaim agus teagasc níos fearr don duine (TFC 20 – 2015);
• ardteicneolaíochtaí cluichíochta/cluichithe dhigitigh (TFC 21-2014).

Tar éis thionscnamh Pharlaimint na hEorpa, cómhaoiníonn an Coimisiún treoirthionscadal agus gníomhaíochtaí ullmhúcháin, is iad seo a leanas na gníomhaíochtaí atá ar siúl faoi láthair:

• réamhbheart — Rochtain ar uirlisí oideachais a mhéadú i limistéir agus i bpobail ina bhfuil nascacht íseal nó rochtain ar theicneolaíochtaí (PPPA-2021-RemoteDigEdu);
• glao ar threoirthionscadal — Girls 4 STEM in Europe (Girls4STEM-2019) agus an tionscadal roghnaithe GEM — Empower Girls to Embrace their Digital and Entrepreneurial Potential [Cumhacht a thabhairt do Chailíní a n-acmhainneacht dhigiteach agus fiontraíochta a thapú].

Digitiú scoileanna

Rinne an Coimisiún an dara suirbhé ar scoileanna: TFC san oideachas in 2019. Bhí dhá chuspóir ag an suirbhé:

1. dul chun cinn a thagarmharcáil in TFC i scoileanna;
2. samhail a shainiú le haghaidh seomra ranga ardtrealmhaithe agus nasctha.

Rinneadh an suirbhé i 31 thír (AE27 + an Ríocht Aontaithe, an Iorua, an Íoslainn agus an Tuirc). Cuireann sé tagarmharcáil mhionsonraithe iontaofa ar fáil maidir le húsáid TFC san oideachas scoile ar fud na hEorpa, agus soláthar, úsáid, muinín agus dearcthaí bonneagair.

D’fhoilsigh an Coimisiún Eorpach staidéar freisin ar sheirbhísí leathanbhanda bunaithe ar shatailítí i scoileanna. Léiríodh sa staidéar nach raibh 18% de bhunscoileanna agus de mheánscoileanna an Aontais nasctha le leathanbhanda in 2015. Thángthas ar an gconclúid sa staidéar go bhféadfadh an leathanbhanda satailíte a bheith ina rogha éifeachtúil do scoileanna nach bhfuil nasctha go maith. Mhol sé freisin go bhféadfaí scéim dearbhán a úsáid mar uirlis chun an bhearna leathanbhanda do scoileanna a dhúnadh.