L-operaturi ħadu malajr miżuri volontarji b’solidarjetà man-nies li qed jaħarbu mill-gwerra. Fit-8 ta’ April, il-Kummissjoni Ewropea u l-Parlament Ewropew ikkoordinaw l-iffirmar ta’ dikjarazzjoni konġunta bejn l-operaturi biex jistabbilixxu approċċ ikkoordinat għal applikazzjoni usa’ madwar l-Ewropa, u biex jinkoraġġixxu aktar operaturi biex jissieħbu.
Sa mill-iffirmar inizjali, l-operaturi tal-UE u tal-Ukrajna jkomplu japplikaw il-miżuri kif maqbula mid-dikjarazzjoni konġunta (ara d-dokumenti hawn taħt). B’dan il-mod, huma kapaċi jsostnu t-tnaqqis tat-tariffi interoperaturi mhux regolati u jkomplu jipprovdu servizzi essenzjali ta’ komunikazzjoni.
Is-sejħiet bejn il-fruntieri żdiedu b’mod sinifikanti
Bis-saħħa tad-dikjarazzjoni konġunta, il-ftehim ġie applikat b’mod wiesa’ madwar l-Ewropa kollha u ffaċilita l-komunikazzjoni b’modi differenti. L-operaturi Ukreni jistgħu jipprovdu roaming bla ħlas jew affordabbli lill-abbonati tagħhom fl-UE. L-għadd ta’ pajjiżi koperti mill-ftehim qed jiżdied hekk kif aktar operaturi jaderixxu mad-dikjarazzjoni konġunta. Bħala medja, it-tliet operaturi Ukreni joffru jew roaming bi prezzijiet domestiċi, roaming affordabbli jew data mobbli bejn il-fruntieri fi 25-il Stat Membru tal-UE u saħansitra lil hinn — f’madwar 32 pajjiż.
L-għan tal-ftehim huwa li jitnaqqsu t-tariffi bl-ingrossa bejn l-operaturi għal telefonati transfruntiera li jużaw networks mobbli differenti. It-tariffi mnaqqsa mbagħad jiġu riflessi fi prezzijiet aktar baxxi għall-utenti finali u komunikazzjoni ffaċilitata bejn il-fruntieri. Dan ifisser li madwar 4,5 miljun Ukren li jużaw ir-roaming fl-UE jistgħu jċemplu lura lejn l-Ukrajna u jużaw l-internet mobbli b’rati bla ħlas jew affordabbli.
Ir-refuġjati jistgħu jużaw data affordabbli u jagħmlu telefonati b’xejn jew bi prezz raġonevoli mas-SIM cards Ukreni tagħhom, kif ukoll jagħmlu sejħiet affordabbli lill-Ukrajna permezz tas-SIM cards tal-UE tagħhom, distribwiti mill-operaturi tat-telekomunikazzjoni tal-UE. L-impatt tad-Dikjarazzjoni Konġunta fuq ir-refuġjati kif irrappurtat mill-BEREC kien konsiderevoli b’ 80 operatur tal-mowbajl tal-UE li joffru telefonati internazzjonali mingħajr ħlas lill-Ukrajna u 44 operatur tal-mowbajl tal-UE li joffru telefonati bi prezz orħos. It-tliet operaturi Ukreni kollha offrew ukoll roaming jew roaming mingħajr ħlas bi prezzijiet domestiċi għall-abbonati tagħhom bħalissa fl-UE u joffru wkoll telefonati internazzjonali b’xejn u bi ħlas imnaqqas lill-UE. Aktar minn hekk, l-operaturi qed joffru sejħiet b’xejn jew irħas lill-vjaġġaturi fl-Ukrajna, u qed jappoġġaw lill-ħafna ħaddiema umanitarji involuti fl-għajnuna fuq il-post. Aktar informazzjoni dwar l-impatt tal-ftehim tista’ tinstab fuq il-paġna web tal-BEREC.
Dan kollu kien possibbli minħabba li l-operaturi ddeċidew li jnaqqsu t-tariffi li jitolbu lil xulxin għall-użu ta’ networks differenti li jippermettulhom jipprovdu servizzi ta’ komunikazzjoni bejn il-fruntieri. L-impatt tad-Dikjarazzjoni Konġunta fuq ix-xejra’ l isfel fil-prezzijiet bl-ingrossa bejn l-operaturi tal-UE u tal-UA huwa kkonfermat mir-rapport tal-BEREC. Pereżempju bħala riżultat tal-impenji volontarji tal-operaturi, ir-rati ta’ terminazzjoni li l-operaturi tal-UA jħallsu lill-operaturi tal-UE firmatarji tal-IK naqsu, u huma madwar 70 % inqas mill-medja tal-UE. Barra minn hekk, skont l-operaturi tal-UA, ir-rati bl-ingrossa għar-roaming tad-data li l-operaturi tal-UA jħallsu bħala medja lill-operaturi tal-UE naqsu b’ 30 % u diġà huma ferm inqas mil-limiti massimi bl-ingrossa li għandhom jiġu applikati fl-UE abbażi tar-regoli dwar ir-Roaming u għalhekk qed jiffaċilitaw offerti ta’ roaming bla ħlas għar-refuġjati UA li jużaw l-UA SIM cards tagħhom.
Din id-Dikjarazzjoni Konġunta tibqa’ miftuħa għall-operaturi kollha li jixtiequ jiffirmaw fi kwalunkwe ħin f’solidarjetà mar-refuġjati mill-Ukrajna. Innota li firma fiżika mhijiex meħtieġa, iżda kumpanija li tixtieq tissieħeb għandha tibgħat email, li tindika r-rieda li tiffirma d-Dikjarazzjoni Konġunta u tehmeż logo tal-kumpanija ma’: CNECT-B2@ec.europa.eu.
Hawn taħt issib id-Dikjarazzjoni Konġunta ffirmata mill-operaturi tal-UE u Ukreni dwar il-konnettività b’appoġġ għar-refuġjati mill-Ukrajna u l-estensjoni tad-Dikjarazzjoni Konġunta.
Aġġornat fit-30 ta’ Settembru