Kontenut illegali fuq pjattaformi online

Rakkomandazzjoni dwar miżuri biex jiġi indirizzat b’mod effettiv il-kontenut illegali online

Il-Kummissjoni hija mħassba li t-tneħħija tal-kontenut illegali online mhijiex effettiva biżżejjed.

Kwistjonijiet bħall-inċitament għat-terroriżmu, id-diskors ta’ mibegħda illegali, il-materjal ta’ abbuż sesswali tat-tfal, il-ksur tad-drittijiet tal-Proprjetà Intellettwali u l-protezzjoni tal-konsumatur jeħtieġu approċċ b’saħħtu u kkoordinat fl-UE kollha.

Il-Kummissjoni ħarġet Rakkomandazzjoni dwar miżuri biex jiġi indirizzat b’mod effettiv il-kontenut illegali online. Din ir-Rakkomandazzjoni tittraduċi l-impenn politiku ta’ Komunikazzjoni preċedenti dwar l-indirizzar tal-kontenut illegali online f’forma legali mhux vinkolanti.

Il-pjattaformi online jeħtieġ li jkunu aktar responsabbli fil-governanza tal-kontenut. Ir-rakkomandazzjoni tipproponi approċċ komuni għall-identifikazzjoni, it-tneħħija u l-prevenzjoni rapidi u proattivi tal-apparenza mill-ġdid tal-kontenut online.

• Proċeduri aktar ċari ta' "avviż u azzjoni": Jenħtieġ li l-pjattaformionline jistabbilixxu regoli faċli u trasparenti għan-notifika ta' kontenut illegali, inklużi proċeduri rapidi għal "senjalaturi fdati". Il-fornituri tal-kontenut jenħtieġ li jiġu infurmati dwar tali deċiżjonijiet u jkollhom l-opportunità li jikkontestawhom sabiex jevitaw it-tneħħija mhux intenzjonata ta' kontenut legali.
• Għododaktar effiċjenti u teknoloġiji proattivi: Il-kumpaniji għandhom jistabbilixxu sistemi ċari ta' notifika għall-utenti. Jenħtieġ li jkollhom għodod proattivi biex jidentifikaw u jneħħu kontenut illegali, b'mod partikolari għal kontenut terroristiku u għal kontenut li ma jeħtieġx kuntestwalizzazzjoni biex jitqies illegali, bħal materjal ta' abbuż sesswali tat-tfal jew oġġetti ffalsifikati.
• Salvagwardji aktarb’saħħithom biex jiġu żgurati d-drittijiet fundamentali: Il-kumpanijigħandhom jistabbilixxu salvagwardji effettivi u xierqa biex jiżguraw li d-deċiżjonijiet biex jitneħħa l-kontenut ikunu preċiżi u fondati. Dan huwa partikolarment importanti meta jintużaw għodod awtomatizzati. Dawn is-salvagwardji jenħtieġ li jinkludu s-sorveljanza u l-verifika mill-bniedem. Dawn għandhom jitfasslu b'rispett sħiħ għad-drittijiet fundamentali, il-libertà tal-espressjoni u r-regoli dwar il-protezzjoni tad-data. 
• Attenzjoni speċjali għall-kumpaniji ż-żgħar: Jenħtieġ li l-industrija, permezz ta' arranġamenti volontarji, tikkoopera u tikkondividi l-esperjenzi, l-aħjar prattiki u soluzzjonijiet teknoloġiċi, inklużi għodod li jippermettu d-detezzjoni awtomatika. Din ir-responsabbiltà kondiviża għandha tkun ta' benefiċċju b'mod partikolari għal pjattaformi iżgħar b'riżorsi u għarfien espert aktar limitati.
• Kooperazzjoni aktar mill-qrib mal-awtoritajiet: Jenħtieġ li l-kumpaniji jinfurmaw minnufih lill-awtoritajiet tal-infurzar tal-liġi jekk ikun hemm evidenza ta' reat kriminali serju jew suspett li l-kontenut illegali jkun ta' theddida għall-ħajja jew għas-sikurezza. L-Istati Membri huma mħeġġa jistabbilixxu l-obbligi legali xierqa.

Il-Kummissjoni tqis li l-intermedjarji online jistgħu jistabbilixxu miżuri proattivi mingħajr ma jitilfu l-eżenzjoni mir-responsabbiltà skont id-Direttiva dwar il-Kummerċ Elettroniku.

Il-kuntest

Is-servizzi tal-Kummissjoni wettqu diversi workshops u djalogi mal-industrija u nedew studju kontinwu dwar is-suġġett. Dawn id-diskussjonijiet ipprovdew kontribut għar-Rakkomandazzjoni. Diversi Kummissarji ltaqgħu ma’ pjattaformi online fl-2018 sabiex jiżguraw l-impenn tagħhom biex jindirizzaw il-kontenut illegali.

L-approċċ huwa allinjat u konsistenti bis-sħiħ mad-Direttiva dwar id-Drittijiet tal-Awtur, inklużi aspetti diskussi b’mod wiesa’ tar-responsabbiltà tal-pjattaformi online. Hija wkoll konsistenti bis-sħiħ mar-reviżjoni tad-Direttiva dwar il-Midja Awdjoviżiva.

Il-Kummissjoni pproponiet valutazzjoni tal-impatt tal-bidu għal miżuri biex tkompli ttejjeb l-effettività tal-ġlieda kontra l-kontenut illegali online. Il-valutazzjoni tal-impatt ġiet infurmata minn konsultazzjoni pubblika miftuħa, li eżaminat l-għażliet għal aktar miżuri biex jiġi indirizzat il-kontenut illegali online.

L-Att dwar is-Servizzi Diġitali

Il-Kummissjoni pproponiet Att dwar is-Servizzi Diġitali (DSA), li jinkludi miżuri kontra oġġetti, servizzi u kontenut illegali online. 

Id-DSA se jagħti s-setgħa lill-utenti biex jirrapportaw kontenut illegali online. Dan se joħloq mezz privileġġat għas-sinjalaturi fdati biex jirrapportaw kontenut illegali bi prijorità. Is-sinjalaturi fdati huma dawk li wrew għarfien espert u kompetenza partikolari. 

Meta jkunu permessi mil-liġijiet nazzjonali, l-awtoritajiet tal-Istati Membri se jkunu jistgħu jordnaw lil kwalunkwe pjattaforma li topera fl-UE, irrispettivament minn fejn ikunu stabbiliti, biex tneħħi kontenut illegali.

Fl-aħħar nett, il-pjattaformi online kbar ħafna se jkollhom jieħdu miżuri ta’ mitigazzjoni biex jipproteġu lill-utenti tagħhom minn kontenut, oġġetti u servizzi illegali.