Reviżjoni tad-Direttiva dwar is-Servizzi tal-Media Awdjoviżiva - AVMSD

Ir-reviżjoni tad-Direttiva dwar is-Servizzi tal-Media Awdjoviżiva (AVMSD) ġiet proposta mill-Kummissjoni, u kienet is-suġġett ta’ negozjati intensi bejn il-koleġiżlaturi. Il-Parlament Ewropew adotta rapport dwar il-forniment ta' servizzi tal-media awdjoviżiva. Il-Kunsill adotta l-AVMSD riveduta fl-2018, li lestiet il-proċess leġiżlattiv. L-Istati Membri kellhom sa Settembru 2020 biex jittrasponu l-AVMSD fil-leġiżlazzjoni nazzjonali tagħhom.

X’hemm ġdid fl-AVMSD riveduta?

L-AVMSD riveduta toffri ħafna elementi ġodda: 

• Prinċipju msaħħaħ tal-pajjiż ta’ oriġini, b’aktar ċarezza dwar liema regoli tal-Istat Membru japplikaw, proċeduri ta’ deroga allinjati għax-xandara tat-televiżjoni u għall-fornituri tas-servizzi fuq talba u possibbiltajiet għal derogi f’każ ta’ tħassib dwar is-sigurtà pubblika u riskji serji għas-saħħa pubblika.
• Estensjoni ta’ ċerti regoli awdjoviżivi għal pjattaformi ta’ video-sharing u servizzi tal-midja soċjali.
• Protezzjoni aħjar tal-minorenni kontra kontenut dannuż fid-dinja online, inkluż it-tisħiħ tal-protezzjonijiet fuq is-servizzi tal-video-on-demand.
• Protezzjoni msaħħa tat-TV u tal-video-on-demand kontra l-inċitament għall-vjolenza jew għall-mibegħda, u l-provokazzjoni pubblika biex jitwettqu reati terroristiċi.
• Obbligi akbar għall-promozzjoni ta’ xogħlijiet Ewropej għal servizzi fuq talba.
• Aktar flessibbiltà fir-reklamar televiżiv, li tippermetti lix-xandara jagħżlu b’mod aktar liberu meta juru r-reklami matul il-jum. Il-limitu globali huwa stabbilit għal 20 % tal-ħin tax-xandir bejn is-6:00 u s-18:00 bl-istess sehem permess matul il-ħin ewlieni (mis-18:00 sa nofsillejl).
• Dispożizzjonijiet imsaħħa għall-protezzjoni tat-tfal minn komunikazzjonijiet kummerċjali awdjoviżivi mhux xierqa. Il-pjattaformi ta' video-sharing għandhom jirrispettaw ukoll ċerti obbligi għall-komunikazzjonijiet kummerċjali.
• L-indipendenza tar-regolaturi awdjoviżivi.

Sfond

Ix-xenarju tal-midja nbidel b’mod drammatiku matul dawn l-aħħar għaxar snin. Minflok ipoġġu quddiem it-TV tal-familja, miljuni ta’ Ewropej issa jaraw il-kontenut online fuq apparati mobbli differenti. 

Il-Kummissjoni pproponiet Direttiva riveduta dwar is-Servizzi tal-Media Awdjoviżiva f’Mejju 2016 li kienet tinkludi approċċ ġdid għall-pjattaformi online li jxerrdu kontenut awdjoviżiv. Id-Direttiva attwali tal-UE dwar is-Servizzi tal-Media Awdjoviżiva tirregola l-koordinazzjoni mal-UE kollha tal-leġiżlazzjoni nazzjonali dwar il-media awdjoviżiva kollha.

Il-Kummissjoni Ewropea organizzat konsultazzjoni pubblika biex tfittex il-fehmiet tal-partijiet interessati kollha dwar kif ix-xenarju tal-media awdjoviżiva tal-Ewropa jista’ jiġi adattat għall-iskop tiegħu fl-era diġitali. Id-dokument huwa disponibbli bil-lingwi kollha tal-UE. 

Biex tindirizza sfidi oħra għall-funzjonament tas-suq intern tal-media, il-Kummissjoni ppreżentatproposta għall-AttEwropew dwar il-Libertà tal-Media f’Settembru 2022. Waħda mill-miżuri proposti hija t-trasformazzjoni tal-Grupp ta’ Regolaturi Ewropej għas-Servizzi tal-Media Awdjoviżiva (ERGA) stabbilit skont l-AVMSD f’Bord Ewropew ġdid għas-Servizzi tal-Media.